Hindi pa rin inaabisuhan ang mga bakwit na bumalik sa kani-kanilang mga tahanan sa Marawi City dahil sa patuloy na pagpapalitan ng putok sa pagitan ng mga tropa ng pamahalaan at ng ISIS-inspired Maute terror group.
Ayon sa tagapagsalita ng Lanao del Sur crisis management committee na si Zia Alonto Adiong, wala pang pinal na abiso mula sa Joint Task Force Marawi na maaari nang pauwiin ang mga bakwit.
Nilinaw naman ni Adiong na mayroong mga residente na nanatili sa kanilang mga bahay at hindi na lumikas papunta sa mga kalapit na lugar ng lungsod.
Aniya, ang mga ito ay hindi ikinokonsiderang ‘returnee’ dahil hindi naman sila umalis sa kanilang lugar malapit sa Mindanao State University, Provincial Police Station, at sa bahagi ng Barangay Basak Malutlut.
Samantala, ayon kay presidential spokesperson Ernestoo Abella, nananatili po ring sarado ang Masjid Abu Bakr Mosque na nasa loob ng main battle area sa Marawi.
Ayon pa kay Abella, kabilang sa mga nabawi na ng pamahalaan ang Grand Mosque, Jamiatul Philippines Al-Islamiya School, Bayabao o Bangolo, at Masiu Bridges, Pacasum Square, maging ang mga pangunahing moske sa Barangay Marinaut.