Nasugatang pulis sa anti-drug operations sa Caloocan, pinarangalan ng PNP

Ginawaran ng parangal na “Medalya ng Sugatang Magiting” ni Philippine National Police (PNP) Chief Ronald Dela Rosa si PO1 Ronald Anicete, ang pulis na nasaksak matapos manlaban ang drug suspect na si Cesar Ariola sa Caloocan.

Sa kanyang pagbisita sa Chinese General Hospital, kinilala ni Dela Rosa ang kabayanihang ginawa ni Anicete makaraang malagay sa panganib ang buhay nito dahil sa pagtupad sa kanyang tungkulin.

Kasabay ng paggawad ng medalya, iniangat na rin sa PO2 ang ranggo ni Anicete.

Pinagkalooban din ito ng 9MM na baril at cash gift.

Ayon kay Dela Rosa, dapat tularan ng kanyang mga kabaro ang ginawa ni Anicete.

Nagpapatunay din aniya ito na hindi naman lahat ng pulis Caloocan ay puro kalokohan kundi karamihan sa kanila ay gumagawa rin ng kabutihan.