Ipinagpaliban na ng Commission on Elections ang Barangay at Sangguniang Kabataan elections sa Mindanao na nakatakda sanang idaos sa darating na Oktubre.
Ito ang naging pasya ng Commission En Banc dahil sa patuloy na gulo at rebelyon sa lugar dahilan kaya isinailalim sa martial law ang rehiyon.
Ayon kay Comelec Spokesman James Jimenez, naging basehan ang desisyon alinsunod sa Omnibus Election Code na nagbibigay ng kapangyarihan sa komisyon na magpaliban ng eleksyon.
Naging pinal ang pasya ng Commission En Banc matapos pag-aralan ang naging public hearing na isinagawa sa Davao City noong August 15 na tumalakay sa nuo’y panukala pa lamang ng election postponement.
Base sa Section 5 ng Omnibus Election Code, may kapangyarihan ang komisyon na magpaliban ng botohan kung nahaharap ang alinmang political subdivision sa karahasan, terorismo, pagkawala ng election records na maaaring maging hadlang sa pagdadaos ng malaya at tapat na eleksyon.