Inutusan na ni Justice Secretary Vitaliano Aguirre ang National Bureau of Investigation na imbestigahan ang pagkamatay ng 19-anyos na si Carl Angelo Arnaiz noong August 18.
Sa department order na inilabas ni Aguirre, inatasan niya ang NBI na magsagawa ng case build-up upang makapagsampa ng kaukulang kaso sakaling may sapat na ebidensya.
Napatay si Arnaiz sa isang police operation sa Caloocan City matapos umanong mangholdap ng isang taxi driver ang binate noong August 18 ng madaling-araw.
Nauna nang sinabi ng mga pulis na nakuha mula kay Arnaiz ang ilang gramo ng marijuana at tatlong pakete ng shabu.
Nakita na lamang ang bangkay ni Arnaiz sa isang morgue sa Caloocan City sampung araw matapos itong mawala nang magpalaam na bibili lamang ng pagkain.
Batay sa post-mortem analysis ng Public Attorney’s Office, nakitaan ito ng indikasyon na tinorture muna si Arnaiz bago pinatay.
Taliwas ito sa naging pahayag ng pamunuan ng Caloocan City PNP na napatay sa isang barilan ang biktima.
Nawawala pa rin hanggang sa ngayon ang kasama ni Arnaiz na si Reynaldo de Guzman.