Itinalaga na ni Philippine National Police (PNP) chief Dir. General Ronald Dela Rosa si Police Chief Inspector Jovie Espenido bilang officer in charge ng Iloilo City Police Office.
Paliwanag ni Dela Rosa, OIC na muna ang designation ni Espenido dahil para sa isang highly urbanized area kagaya ng Iloilo ay kinakailangan na senior superintendent ang ranggo ng mamumuno.
Ayon kay Dela Rosa, kahapon niya nilagdaan ang kautusan kay Espenido.
Sa kabila ng nilagdaang kautusan aminado si Dela Rosa na nag-aalangan pa rin siyang ilipat si Espenido sa Iloilo mula sa Ozamiz City Police.
Paliwanag ni Dela Rosa, tumututol kasi ang mga residente sa Ozamiz na alisin si Espenido dahil hindi pa tapos ang problema sa ilegal na droga sa lugar.
Sinabi pa ni Dela Rosa na kung siya lamang ang masusunod mas nanaiisin niyang manaitili si Espenido sa Ozamiz.
Pero dahil sa presidential order at mismong si Pangulong Rodrigo Duterte ang nag-assign kay Espenido sa Iloilo ay wala siyang magagawa kundi ang tumalima.