Accreditation ng mga social media bloggers hindi daw hahaluan ng kulay-pulitika

Hindi umano hahaluan ng political color ng Malakanyang ang akreditasyon sa mga social media practitioners na gustong makapag-kober sa mga lakad at aktibidad ni Pangulong Rodrigo Duterte.

Iyan ang paglilinaw ni Communications Secretary Martin Andanar sa harap ng imbitasyon ng Palasyo sa mga blogger na magpa-accredit, sila man ay Pro o Anti-Duterte.

Ayon kay Andanar, kailangan lamang maging consistent ng mga blogger sa kanilang write-ups hinggil sa pangulo.

Kailangan din aniyang humingi ng approval ang mga blogger sa Presidential Security Group kapag sila ay magkokober sa Presidente.

Ang accreditation aniya ng mga blogger o social media practitioners ay hindi bilang journalist o mamamahayag at hindi bilang miyembro ng mainstream media o ng Malacañang Press Corps.

Kamakailan ay nilagdaan ng kalihim ang Department Order No. 15 o interim social media practitioner accreditation para payagan ang mga social media practitioner o bloggers na may edad 18 pataas at may 5,000 followers ang kanilang social media page.