Grade 9 student, arestado sa Pangasinan dahil sa pagbibitbit ng baril

Inaresto ang isang estudyanteng nasa Grade 9 matapos magdala ng baril sa paaralan sa bayan ng Burgos, Pangasinan.

Ayon kay Sr. Inspector Eddie Suyat, hepe ng pulisya ng Burgos, inakala ng guro na si Evelyn Cabalbag na nanonood lamang ng video sa cellphone ang estudyante at ang katabi nito.

Nang lapitan ni Cabalbag ang dalawa dahil sa hindi pakikinig sa klase, nadiskubre niya ang isang baril na nakabalot sa t-shirt.

Ipinagbigay-alam ito ng Jose Rivera Bonsay National High School sa mga otoridad.

Tinukoy ni Suyat ang baril bilang isang homemade na 9-millimeter na baril.

Dinala na sa pulisya ang mag-aaral at sinampahan na ng kasong illegal possession of firearms.