Bagay na itinago ni Vice Mayor Parojinog mula sa mga pulis, hindi shabu – Topacio
Mariing itinanggi ni Atty. Ferdinand Topacio na iligal na droga ang pilit na itinatago ni Ozamiz City Vice Mayor Nova Princess Parojinog mula sa mga pulis sa isang cell phone video na kumalat na rin sa social media.
Giit ni Topacio, ang shabu ay water soluble kaya kung nilunok ito ng kaniyang kliyente, posibleng nangisay na ito agad dahil sa dami nito sakali mang ito ay iligal na droga.
Sa video kasi na nakuhanan sa raid sa bahay ni Parojinog kung saan umano nasabat ng mga pulis ang mga iligal na droga, nakita ang bise alkalde na may hawak na pilit itinatago sa kaniyang kamay at mayroon pang mistulang isinubo o nilunok niya.
Gayunman, hindi na sinabi ni Topacio kung ano ang bagay na itinago ni Parojinog, pero tiniyak niyang ibubunyag niya ito oras na may isampa nang kaso laban sa kaniyang kliyente kaugnay nito.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.