Muling nagpalabas ng yellow rainfall warning ang PAGASA sa Metro Manila at mga kalapit na probinsya kaninang alas-dos ng hapon.
Dahil dito, inaasahang magpapatuloy ang nararanasan mga pag-ulan dahil sa southwest monsoon o habagat.
Sa latest weather bulleting ng PAGASA, isinailalim sa yellow rainfall warning ang Metro Manila, Bataan, Bulacan, Tarlac at Zambales.
Samantala, patuloy na mararanasan ang mahina hanggang sa katamtaman at pabugso bugsong malakas na pag-ulan ang Nueva Ecija at Calabarzon.
Tanging ang probinsya ng Pampanga ang nadagdagan sa listahan.
Bukod sa habagat, nagdudulot din ng mga pag-ulan sa bansa ang bagyong Gorio, na nagresulta ng pagkakansela ng mga klase sa iba’t ibang lungsod sa Metro Manila at kalapit na lugar.
Nauna nang sinabi ng PAGASA na hanggang sa araw ng Linggo magiging maulan sa malaking bahagi ng Luzon.