Humingi ng pang-unawa sa publiko si Atty. Ferdinand Topacio hingil sa isinasagawang kilos-protesta ng Iglesia ni Cristo laban kay Justice Sec. Leila de Lima sa kahabaan ng EDSA.
Sa panayam ng Radyo Inquirer, sinabi ni Topacio na isa ring miyembro ng INC na ang kanilang ginagawa ay bahagi lamang ng isang malayang pamamahayag at pagtitipon.
Sabi ni Topacio,”kahit ang ating Saligang-Batas ay nagsasabi na dapat garantiyahan ng pamahalaan ang malayang pamamahayag ng damdamin ng isang indibiduwal o grupo”.
Nilinaw din ni Topacio na kailanman ay hindi naging bahagi ng pagpapabagsak sa pamahalaan ang mga kasapi ng Iglesia ni Cristo.
Tiniyak din ni Topacio na magiging maayos ang kanilang kilos-protesta at hindi sila pagmumulan ng anumang uri ng kaguluhan na pwedeng mauwi sa sakitan sa hanay ng mga protesters at tauhan ng pulisya.
“Ang ipinaglalaban naming dito ay malinaw, patas na pagpapatupad ng hustisya ang aming hiling at hindi na dapat gawing isyu ang relihiyon, humihingi rin kami ng pang-unawa sa mga naabala sa kanilang byahe”, dagdag na paliwanag ni Topacio.