Lorenzana, humingi ng tawad sa mga posibleng pagmamalabis ng mga sundalo sa Marawi

 

Humingi ng paumanhin si Defense Sec. Delfin Lorenzana sa mga residente ng Marawi City para sa kung anumang pang-aabuso o karahasang ipinakita ng mga sundalo sa kanila.

Ayon kay Lorenzana, sakali mang may ginawa ang mga sundalo na medyo higit na sa dapat nilang gawin ay siya na ang humihingi ng tawad para sa mga ito.

Paliwanag ng kalihim, nagawa lang ng mga sundalo ang mga ganoong bagay marahil ay dahil na rin sa dami ng nalagas sa kanilang tropa, at para huwag nang madagdagan pa.

Kasabay nito ay humiling si Lorenzana ng karagdagan pang pasensya mula sa mga residente at aniya, kaunting pagtitiis na lang ang kailangan.

Dagdag pa ni Lorenzana, sinabi naman na sa kanila ng mga ground commanders na malapit nang matapos ang bakbakan sa lungsod.