Pirmado na ni Pangulong Rodrigo Duterte at hawak na ngayon ni Defense Secretary Delfin Lorenzana ang Administrative Order number 3 na magtatatag ng inter- agency task force para makabangon na ang Marawi City sa gitna ng nagaganap na giyera sa pagitan ng tropa ng pamahalaan at ng teroristang Maute group.
Sa Mindanao Hour sa Malacañang, sinabi ni Lorenzana na siya ang magsisilbing chairperson ng nilikhang task force na tatawaging Task Force Bangon Marawi.
Paliwanag ni Lorenzana, bilang pinuno rin ng National Disaster Risk Reduction and Management Council o NDRRMC, gagamitin niya ang ahensiya bilang behikulo sa gagawing rehabilitasyon dahil maaaring namang ikunsidera ang nangyari sa Marawi bilang disaster.
Kaugnay nitoy inihayag ng kalihim na agad nilang ihahanda ang mga kakailanganing mekanismo para sa rehabilitasyon ng nawasak na lunsod at itoy sa sandaling magwakas na ang labanan.
Tiniyak naman ni Lorenzana na hindi mapupulitika ang ikinakasang pagbangon ng lunsod sa pagsasabing wala namang siyang ambisyong pulitikal.