Arestado ang dalawang lalaki matapos mahulihan ng mahigit 9 na kilo ng iligal na marijuana sa ikinasang buy-bust operation sa Brgy. 814, Zone 88, Paco, Maynila.
Kinilala ang mga suspect na sina Sonny Boy Agucay, 27-anyos, at ang target ng operasyon na si Gilbert Rosales, alyas ‘Imbet’ na anak ng Kagawad ng barangay.
Ayon kay Sr. Insp. Val Valencia, hepe ng Station Drug Enforcement Unit ng Pandacan Police, ikinasa nila ang operasyon sa mismong bahay ng suspect.
Nagpanggap na buyer ang isang operatiba, at bumili ng 1/4 kilo ng marijuana sa halagang P1,200.
Nang magkaabutan na ng pera at marijuana, dito na inaresto ang mga suspect.
Nakuha sa mga suspect ang 9.5 kilos ng marijuana na nagkakahalaga ng humigit-kumulang P70,000 at isang timbangan.
Inamin naman ng mga suspect na nagbe-benta sila ng marijuana, at sa Bagong Silang, Caloocan umano nila ito kinukuha mula sa isang alyas ‘Nanay’.
Mahaharap ang mga suspect sa kasong paglabag sa Republic Act 9165 o Comprehensive Dangerous Drugs Act of 2002.
