Revised IRR, tapos na ng DOTr; balak ibalik sa Hulyo
Nakagawa na ang Department of Transportation (DOTr) ng revised na implementing rules and regulations (IRR) ng Anti-Distracted Driving Act (ADDA).
Sa isang pahayag, nilinaw ni DOTr assistant secretary for legal affairs Leah Quiambao na pinagbabawalan lang naman ang paghawak o paggamit ng mga mobile at electronic gadgets habang nagmamaneho o kaya habang sandaling nakatigil sa traffic light o intersection.
Gayunman aniya, kung mayroon namang hands-free function ang mga devices na gamit ng nagmamaneho ay papayagan naman ito.
Sinabi rin ni Quiambao na hindi sakop ng ADDA ang mga dashboard cameras o dashcams, pero hinihimok nila ang mga motorista na ilagay na lang ito sa likod ng rearview mirror alang-alang sa kanilang kaligtasan.
Kasama na rin sa revised IRR ang kahulugan ng “line of sight,” kung saan papayagan ang pagkakabit ng mga device sa loob ng “safe zone” o hindi hihigit sa apat na pulgada mula sa dashboard.
Kabilang sa mga ipinagbabawal sa ilalim ng ADDA ay ang paghawak sa device para tumawag, mag-text o magbasa ng text, magsagawa ng calculations, maglaro ng games, manood ng videos at mag-browse sa internet.
Target namang ibalik ng DOTr ang pagpapatupad ng ADDA sa unang linggo ng Hulyo.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.