Restaurant sa Makati Cinema Square, tinupok ng apoy

Nasunog ang bahagi ng isang restaurant sa Makati Cinema Square, Makati City, Martes ng madaling araw.

Nagsimula ang sunog sa Sinangag Express alas 2:56 ng madaling araw.

Mabilis namang nakaresponde ang mga tauhan ng Makati Fire Department kaya umabot lang sa unang alarma ang sunog.

Alas 3:07 naman ng madaling araw nang ideklarang fire out na ang sunog.

Inaalam pa kung ano ang pinagmulan ng sunog, pero sa kusina umano ng restaurant nagsimula ang apoy.

Wala namang nasaktan o nasugatan sa nasabing insidente.