Ina ng Maute brothers arestado sa Masiu, Lanao Del Sur
MARAWI CITY – Nadakip na rin ang ina ng Maute brothers sa Masiu, Lanao Del Sur.
Ito ay base mismo sa impormasyon mula kay Autonomous Region in Muslim Mindanao (ARMM) Regional Director Reuben Theodore Sindac.
Maliban kay Omenta Romato Maute alyas “Farhana,” timbog din ang dalawang iba pang sugatang miyembro ng Maute Group.
Si Farhana Maute ang ina ng magkapatid na sina Omar Romato Maute at Abdullah Romato Maute, lider ng teroristang grupong Maute Group na nakakasagupaan ng mga sundalo sa Marawi City.
Sinasabing na may pitong iba pang hindi pa kilalang mga babae kasama nina Farhana Maute ang kasamang inaresto.
Nagtago sa Brgy Dayawan, Masiu, Lanao Sur ang grupo ni Farhana Maute, kung saan sila ay bumili muna ng sasakyan at mga baril bago sana tumakas sa Lanao Del Sur.
Papatakas na sana ang grupo nila sakay ng gray na Revo nang matiklo sa Brgy Kormatan, Masiu, Lanao del Sur.
Narekober sa grupo ang ilang matataas na kalibre ng mga baril at mga improvised explosive device.
Nauna nang naaresto ang tatay ng Maute brothers na si Cayamora sa Tor, Davao City nuong nakaraang araw, at ngayon ay nasa Camp Bagong Diwa na sa Taguig City.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.