Giit ng Senador, walang katotohanan ang mga binibitawang mga pahayag ng Kalihim at walang basehan ang mga binibitiwang salita nito sa media.
Paliwanag ng Senador, nasa PICC sa Pasay city siya noong May 2 na siyang araw na sinasabi ni Aguirre na nagtungo siya sa Marawi City upang makipag-usap sa umano sa ilang opposition members bago ang Marawi siege.
May 19 siya aniya nagtungo sa Marawi City upang pangunahan ang pagbubukas ng First Negosyo Center sa ARMM ngunit wala siyang ibang kasamang senador.
Payo ni Aquino, dapat iberipika muna ni Aguirre ang kanyang mga pahayag bago ito mag-akusa.
Samantala, tinawag namang malisyoso ang ginawang pagdadawit ni DOJ Sec Vitaliano Aguirre kay Sen Antonio Trillanes sa nagaganap na Marawi siege.
Ayon pa kay Sen Trillanes, mismong si Defense Sec Delfin Lorenzana ang nagsabi na wala siyang anumang kinalaman sa sigalot sa Marawi.
Paglilinaw pa ng senador, hindi rin umano totoo ang alegasyon na nakipagmeeting siya sa Marawi noong Mayo a-dos dahil sa katunayan, hindi umano siya nagagawi ng Marawi sa nakalipas na tatlong taon.
Giit pa ng senador, para matiyak ni Sec Aguirre, pwede umano nito na silipin ang records sa Senado noong May 2 para makita mismo nito kung ano ang totoo.
Payo ng senador sa kalihim, dapat umanong iwasan ni Aguirre ang pagpatol sa mga impormasyon na nakukuha o naipopost sa social media partikular sa ‘FB’ para hindi ito sumasablay.
Idinawit ni Aguirre sa umanoy sabwatan kaya nagkaroon ng Marawi siege sina Sen Trillanes, Sen Bam Aquino, Magdalo Rep Gary Alejano at Ronald Llamas na kalaunan ay binawi nito.