Tatlo pang opisyal ng Ilocos Norte ang na-cite for contempt ng House Committee on Good Government and Public Accountability.
Sa pagdinig kanina ng komite, hindi masagot nina Engineer Pedro Agcaoili, Chairman ng Bids and Awards Committee at pinuno ng Provincial Planning and Development Office, Eden Battulayan, Accountant 4 ng Provincial Accounting Office ng Ilocos Norte; at Provincial Budget Officer na si Evangeline Tabulog ang mga tanong ng mga kongresista.
Ang laging isinasagot ng tatlo na hindi nila matandaan ang mga transaksyon ng pamahalaang panlalawigan kaugnay sa pagbili ng 40 mini cabs, 70 mini trucks at 5 second- hand buses.
Dahil dito, hiniling ni House Majority Leader Rodolfo Fariñas sa komite na ma-cite for contempt ang tatlo dahil malinaw daw na umiiwas sila sa mga tanong.
Hindi anya maaring makalimutan kaagad ng tatlo ang transaksyon dahil 2011 lamang ito nangyari.
Nagsagawa ng pagdinig ang komite dahil sa paggamit ng pamahalaang panlalawigan ng P66.4 Million na pondo galing sa tobaco excise tax.
Inaprubahan din ng komite ang kahilingan upang ipatawag si Ilocos Norte Gov. Imee Marcos dahil sa pangatlong ulit na hindi nito pagsipot sa patawag ng komite.