Aminado si Magdalo Congressman Gary Alejano na hindi pa naihahanda ng grupong Magdalo ang reklamong isasampa laban kay Pangulong Rodrigo Duterte sa International Criminal Court.
Sa ambush interview kay Alejano matapos ang pagbisita kay Sen. Leila De Lima sa PNP Custodial Center sa Camp Crame, Quezon City, sinabi nito na hindi rin pa napagkakasunduan ng Magdalo kung itutuloy o hindi ang paghahain ng reklamo sa ICC.
Matatandaang matapos ibasura ng Kamara ang kanyang inihaing impeachment complaint laban sa pangulo ay sinabi ni Alejano na iaakyat niya ang reklamo sa ICC.
Naging ground ni Alejano sa reklamo ang umano’y nagaganap na extrajudicial killings sa bansa kung saan may partisipasyon umano ang gobyerno.
Sakaling matuloy ang paghahain, kumpiyansa si Alejano na magiging patas ang ICC sa pagtrato sa kanyang reklamo laban sa pangulo.