Kapatid ni Napoles na si Reynald “Jojo” Lim, posibleng susi sa reinvestigation ng PDAF scam
Ipinag utos ni Justice Sec. Vitaliano Aguirre II sa National Bureau of Investigation ang paghahanap sa kinaroroonan ng kapatid ni Janet Napoles na si Reynald “Jojo” Lim.
Naniniwala si Aguirre na si Lim ang magiging susi sa isasagawang muling pag iimbestiga sa maanomalyang Priority Development Assistance Fund o PDAF.
Ayon kay Aguirre, hindi lamang dapat ang NBI ang maghahanap kay Lim, kundi ang Philippine National Police din.
Sinabi din ni Aguirre na nakatanggap na siya ng impormasyon ukol sa isang grupo na hawak umano si Lim.
Lumalabas aniya na binablackmail si Napoles para hindi na magsalita at magdawit ng iba pang personalidad na sangkot sa PDAF scam sa isinagawang imbestigasyon ng nakaraang administrasyon.
Nangako naman si Aguirre na papangalanan niya ang grupo kapag may hawak nang ebidensya ang NBI na susuporta sa naturang impormasyon.
Si Lim ay co-accused ni Napoles sa kasong serious illegal detention na inihain ng whistleblower na si Benhur Luy.
Pero kamakailan ay inabswelto ng Court of Appeals si Napoles sa naturang kaso.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.