Dumistansiya na ang Armed Forces of the Philippines (AFP) sa imbestigasyon sa serye ng pagsabog sa Quiapo, Maynila.
Ayon kay AFP Spokesperson BGen. Restituto Padilla, isang law enforcement operation na umano ito na tinutugunan na ng Pambansang Pulisya.
Samantala, paliwanag ni Padilla, hindi dapat paniwalaan o banggitin man lamang ang pangalan ng grupong nagpapanggap na may kagagawan nito sapagkat walang pangangailangang bigyan sila ng dignidad.
Giit ni Padilla, pawang propaganda lang umano ang ginagawang ito ng umaakong grupo.
May hawak na rin umanong nang lead ang pulisya sa nangyaring pagsabog kung kaya dapat na hayaan na munang gawin ng mga ito ang kanilang trabaho tungo sa ikalulutas ng kaso.
Kasabay nito, nanawagan si Padilla sa publiko at media na wag pabibiktima at pagagamit sa anu pa mang propaganda na lilikha lamang ng takot o pangamba sa publiko.