Ruling ng arbitral court, dapat gamitin ng ASEAN sa pagbuo ng code of conduct framework-Del Rosario

 

Hinimok ni dating Foreign Affairs Secretary Albert Del Rosario ang mga miyembro ng Association of Southeast Asian Nation o ASEAN na ikunsidera ang desisyon ng arbitral tribunal sa usapin West Philippines Sea sa pagbalangkas ng code of conduct sa naturang rehiyon.

Paliwanag ni Del Rosario, dahil sa naturang desisyon, naipairal ang isinasaad ng batas hinggil sa claim ng Pilipinas sa South China Sea.

Ang naturang desisyon aniya ay bahagi na ng international law kaya’t dapat ay maging bahagi rin ito ng bubuuing code of conduct framework at ang inaasahang pinal na resulta ng COC.

Giit pa ng dating Kalihim, dapat ay huwag nang hintayin ng administrasyon ang tamang panahon para talakayin ang pang-aagaw ng teritoryo ng China at sa halip, dapat na manguna na ang Pilipinas sa pagpapairal ng naging desisyon ng International arbitral tribunal.

Una nang sinabi ni Acting DFA Secretary Enrique Manalo na target ng regional bloc na makabuo ng opisyal na Code of Conduct framework sapagsapit ng buwan ng Hunyo.