Nagbabala ang City Veterinary Office ng Quezon City sa publiko na mag-ingat sa mga kumakalat na ibenibentang botcha o doble dead na karne ng baboy sa lungsod.
Ang babala ay ginawa ni City Veterinarian Dra.Anna Marie Cabel matapos makumpiska noong Lunes, March 20 ang mahigit 70 kilo ng baboy na sinasabing walang tatak ng National Meat Inspection Service sa Brgy. Sto. Domingo QC.
Payo niya sa publiko, bago bumili ng karne ay pisilin muna ang karne,hanapin ang tatak ng NMIS, dapat kulay pink ang karne at higit sa lahat walang amoy.
Modus daw kasi ng mga tindera ay binubuhusan ng sariwang dugo para mukhang bago ang kanilang tinitindang karne.
Paliwanag ni Dra. Cabel, ang baboy ay gaya din ng tao na mamatay sa sobrang init ng panahon at ang ibang tindera ay inihahalo ang bucha sa sariwang karne at kapag naluto na ay dito malalaman kung botcha o sariwang karne ng baboy ang kanilang nabili.