Pekeng tax stamps, ibinebenta sa Alibaba.com; founder ng Alibaba na si Jack Ma, sinulatan ng DOF

Sinulatan ng Department of Finance (DOF) ang chairman at founder ng Alibaba.com na si Jack Ma, matapos matuklasan na nagbebenta ang nasabing online shopping ng pekeng cigarette tax stamps.

Ang liham ni Finance Sec. Carlos Dominguez na may subject na “online selling of fake cigarette tax stamps” ay naka-address mismo kay Jack Ma, biulang Chairman ng Alibaba Group sa Hangzhou, China.

Nakasaad sa liham na natuklasan ng pamahalaan ng Pilipinas na nabibili sa Alibaba.com ang mga pekeng tax stamps.

Dahil dito, hiningi ni Dominguez ang kooperasyon ng pamunuan ng Alibaba at hiniling na agad itigil ang pag-advertise o pagbebenta ng pekeng tax stamps ng sigarilyo.

Ipinaalam din ni Dominguez kay Ma ang kasalukuyang effort na ginagawa ng Pilipinas laban sa mga tax evaders, kabilang na ang mga manufacturer ng sigarilyo na hindi nagbabayad ng tamang buwis.

Ayon kay Dominguez, ang pag-advertise at pagbebenta ng pekeng tax stamps sa Alibaba.com ay nagbibigay pa ng mas madaling access para sa mga negosyante ng sigarilyo na matakasan ang pagbabayad ng buwis sa pamahalaan.

“Advertising and selling of fake tax stamps in the open, through your company’s web portal, provides so much room and easy access for individuals and entities to evade excise tax on cigarettes in the Philippines,” nakasaad sa liham ni Dominguez kay Ma.

Kalakip ng nasabing liham ni Dominguez kay ma ang screenshot ng webpage ng Alibaba.com kung saan makikita ang mga larawan ng pekeng tax stamp na ibinebenta.

Binigyan din ng kopya ng nasabing liham ang ambassador ng China sa Pilipinas na si Zhao Jianhua.