Maglalaan ng P50 milyon ang pamahalaan para muling pag-aralan ang kautusan ng Department of environment and Natural resources na nagpapasara sa 28 minahan sa bansa.
Ayon kay Finance Secretary Carlos Dominguez III, gagamitin ang naturang pondo ng Interagency Mining Industry Coordinating Council (MICC) sa kanilang isasagawang komprehensibong pag-aaral sa lahat ng mga mining contracts na pinasok ng kagawaran sa nakalipas na mga taon.
Magmumula aniya ang pondo sa contingency fund ng gobyerno at inaasahang tatagal ang review ng tatlong buwan.
Umaasa naman si Dominguez na sa mga susunod na taon, mapaglalaanan na ng sariling pondo ang MICC.
Si Dominguez ang magsisilbing co-chair ng MICC kasama si Environment Secretary Gina Lopez.
Pag-aaralan ng MICC kung sumusunod ba ang 28 minahan sa mga umiiral na kontrata at kasunduan sa ilalim ng mga isinasaad ng batas.
Ang resulta ng pag-aaral at magiging rekomendasyon ng MICC ay direktang isusumite at dedesisyunan ni Pangulong Rodrigo Duterte.