Naging ‘House of Terrors’ na ang House of Representatives dahil sa pagpapalusot sa panukalang batas na magbabalik sa parusang kamatayan sa ating bansa.
Yan ang reaksyon ni Ifugao Rep. Teddy Baguilat matapos aprubahan ng Kamara sa ikalawang pagbasa ang Death Penalty bill.
Ayon kay Baguilat, bukod sa nakakatakot ay nakakaiyak at nakakahiya na raw ang kinahinatnan ngayon ng Mababang Kapulungan.
Sa kabila nito, sinabi ni Baguilat na tuluy-tuloy ang kanilang paglaban sa Death Penalty bill.
Hindi pa aniya ito katapusan at ang kailangan lamang ay magtulung-tulong ang mga anti-death penalty.
Apela rin ni Baguilat sa publiko partikular sa mga kontra sa panukala, ipagdasal na huwag maging batas ang aniya’y isang ‘inhuman bill’.