Makararanas ng water service interruption ang limang barangay sa Muntinlupa City ngayong araw ng Martes, February 28, 2017.
Sa abiso ng Maynilad, apektado ng interruption ang Alabang, Bayanan, Poblacion, Putatan at Tunasan.
Ang nasabing mga barangay ay maaring makararanas ng mahinang suplay hanggang sa tuluyang pagkawala ng suplay ng tubig mula alas 12:00 ng tanghali hanggang alas 11:00 ng gabi.
Sinabi ng Maynilad na may isinasagawa kasing maintenance activity sa water treatment plant sa Muntinlupa kaya kailangang ipatupad ang water service interruption.
Sa mga apektadong residente na mangangailangan ng rasyon ng tubig, maaring tumawag sa 737-3311.
Tiniyak naman ng Maynilad na agad ibabalik sa normal ang suplay ng tubig kapag natapos na ang pagsasaayos.