Mariing pinabulaanan ni Department of Social Welfare and Development o DSWD Secretary Judy Taguiwalo na pinuwersa ng ahensya ang mga beneficiaries ng 4Ps para dumalo sa pro-Duterte rally sa Luneta kahapon (February 25).
Sa serye ng mga post sa Twitter ni Taguiwalo, sinabi nito na hindi namilit ang DSWD sa 4Ps beneficiaries upang dumalo sa rally na layong suportahan si Pangulong Rodrigo Duturte.
Aniya, sa ilalim ng kanyang pamumuno sa DSWD at direktiba mismo ni Pangulong Duterte ay hindi niya hahayaang magamit ang ahensya sa anumang kampanya o laban sa anumang political agenda.
Dagdag ni Taguiwalo, hindi aniya iba-blackmail ng DSWD ang kanilang beneficiaries at lalong hindi pupuwersahin ang sinuman na pumunta sa mga boycott o political activity.
Sa katunayan, ani Taguiwalo, malaya ang mga benepisyaryo ng DSWD na pumili kung ano ang nais nilang political leanings, nang walang pangamba sa kanilang natatamong benepisyo mula sa alinmang DSWD program.
Nangako naman ang kalihim na iimbestigahan ang mga opisyal at staff ng DSWD na nagsabi raw sa 4Ps beneficiaries na ihihinto ang benepisyo kapag hindi pumunta sa pro-Duterte rally.
Hindi aniya kukunsintihin ng DSWD ang masamang gawain o pang-aabuso, lalo’t ang ahensya ay may mandatong tulungan ang mga mahihirap.