Solgen, gustong makulong muli ang mga NDF consultants

Dapat muling makulong ang mga consultants ng National Democratic Front (NDF) na binigyan ng pansamantalang kalayaan para makasali sa isinagawang usapang pangkapayapaan sa Norway matapos na kanselahin ni Pangulong Rodrigo Duterte ang negosasyon.

Ayon kay Solicitor General Jose Calida, itinuturing na mga pugante na ang mga NDF consultants matapos kanselahin ang piyansa ng mga ito para sa pansamanatalang kalayaan ng Supreme Court (SC).

Binigyang diin ni Calida na ang una sa apat na kondisyon na itinakda ng SC para sa pansamantalang kalayaan ng mga NDF consultants ay otomatikong kanselado ang kanilang piyansa matapos kanselahin ni Duterte ang naturang peace talks.

Matatatandaang pinayagan ang ilang lider ng makakaliwang grupo na makasama sa isinagawang usapang pangkapayapaan bilang mga consultants ng NDF.

Ang NDF ang kumatawan sa Communist Party of the Philippines-New People’s Army (CPP-NPA) sa naturang negosasyon sa pamahalaan.