Mahigit 300 kabahayan, naitalang nasira sa lindol sa Surigao – DSWD

Aabot sa tatlong daang kabahayan ang nasira nang tumamang 6.7 magnitude na lindol sa Surigao del Norte, Biyernes ng gabi.

Ayon sa pinakahuling ulat ng Department of Social Welfare and Development (DSWD), mahigit 326 na bahay ang sira sa dalawampu’t walong barangay sa Surigao City at mga bayan ng Mainit, San Francisco at Sison.

Samantala, nakahanda naman ang 1.6 bilyong pisong pondo ng DSWD upang mag-abot ng tulong sa mga apektadong residente matapos ang naturang trahedya.

Inaasikaso na rin ng ahensya ang pagpapadala ng mahigit 2,500 galon ng tubig sa Barangay Taft kung saan naitala ang pinakamaraming bilang ng mga nasirang kabahayan at mga residenteng nagpapalipas sa kalsada.