Dahil sa problema sa kalusugan, nabigo muli ang dating pulis na si Wally Sombero sa pagdinig ng senado ngayong araw kaugnay sa umano ay pangingikil ng mga opisyal ng Bureau of Immigraiton (BI) sa gaming tycoon na si Jack Lam.
Ayon sa abogado ni Sombero na si Atty. Ted Contacto, nasa Vancouver, Canada pa ngayon ang kaniyang kliyente.
Sinubukan naman talaga aniya ni Sombero na makauwi ng Pilipinas para makadalo sa hearing, pero hindi umano ito pinayagang makasakay ng eroplano dahil sa kaniyang kondisyong pangkalusugan.
Binasa ni Contacto ang liham ni Sombero na nagpapaliwanag sa kaniyang hindi pagsipot.
Nakasaad sa liham na noong February 6, papasakay na sana ng eroplano si Sombero pauwi ng Pilipinas pero nakaranas ito ng palpitations at tumaas ang blood sugar.
May ipinrisinta ring mga larawan na nagpapakita na binibigyan ng atensyong medical si Sombero ng 911 paramedics sa airport ng Vancouver, Canada.
Sa kasagsagan ng pagdinig ayon kay Contacto, nasa paliparan sa Vancouver si Sombero para huminging medical clearance pauwi ng Pilipinas.