18 patay sa sunog sa foot spa sa China

 

Hindi bababa sa 18 katao ang nasawi matapos tupukin ng apoy ang isang foot spa sa Zhajiang province sa eastern China.

Nagsimula ang sunog dakong alas-4:00 ng hapon sa oras sa Tiantai County sa Zhajiang kahapon.

Sa mga video reports ng China Global Television Network (CGTN), makikita ang malaking apoy sa babang palapag ng gusali ng foot spa, habang ang tuluy-tuloy naman ang paglabas ng makapal na usok mula sa ikalawang palapag nito.

Ilan sa mga na-trap sa loob ay tumalon na mula sa mga bintana para makatakas mula sa nagliliyab na gusali.

Agad namang sumugod ang mga Tiantai County Fire Squadron para rumesponde sa sunog, ngunit ayon sa China Xinhua News, 18 na agad ang nasawi habang dalawa naman ang nasugatan sa insidente.