Pinabulaanan ng Social Security System (SSS) ang naging pahayag ni Senate President Pro Tempore Franklin Drilon na ang pagtataas ng kontribusyon ng SSS ay mali at ilegal.
Sinabi ni Social Security Commission Chairman Dean Amado Valdez na ang P1,000 dagdag pensyon na ipatutupad ngayong Enero 2017 ay popondohan ng kasalukuyang kontribusyon at kita sa investments.
Ang dagdag sa kontribusyon na ipatutupad ngayong Mayo ay gagamitin para palakihin ang Investment Reserve Fund, magkaroon ng mas malaking kita mula sa investments at palakasin ang buhay ng pondo ng SSS para sa mga obligasyon nito sa hinaharap.
Binigyang diin ni Dean Valdez na ang mandato ng SSS ay itaguyod ang katarungang panlipunan sa pamamagitan ng pagbibigay ng mas magandang benepisyo para sa mga miyembro kapag sila ay magreretiro na.