DepEd, nilinaw na wala pang go-signal ang pamamahagi ng condoms sa mga eskwelahan

 
Nilinaw ng Department of Education o DepEd na hindi pa nila pinapayagan ang Department of Health o DOH sa planong mamahagi ng condom sa mga eskuwelahan sa susunod na taon.

Ginawa ng DepEd ang pagklaro matapos ilathala ng isang pahayagan na ipatutupad na ng dalawang ahensya ang programa para sa junior at senior high schoolers sa 2017.

Ito’y sa layuning puksain daw ang paglaganap ng human immunodeficiency virus o HIV at Acquired Immune Deficiency Syndrome o AIDS sa hanay ng mga kabataan.

Pero iginiit ni DepEd Secretary Leoner Briones na bagaman maaaring matugunan ng condom distribution ang pagkalat ng mga sexually-transmitted diseases at pagtaas ng bilang ng pagbubutis ng maaga ng mga kabataan ay kailangan muna nilang pag-usapan ang implikasyon  nito sa women sensitivity, religion and culture.