Hindi sinadya ng pambansang pulisya na ilihim ang araw ng paglilibing kay dating Pangulong Ferdinand Marcos sa Libingan ng mga Bayani noong Biyernes.
Sinabi ni Philippine National Police (PNP) Chief Director General Ronald Dela Rosa, sinunod lamang nila ang hiling ng pamilya Marcos.
Ayon kay Dela Rosa, maaaring naging magulo ang sitwasyon kung inanunsyo ng pamunuan ng National Capital Region Police Office (NCRPO) ang araw ng libing.
Sinagot naman ni Dela Rosa ang naging komento ni Vice President Leni Robredo na insulto sa mga Pilipino ang tila panakaw na pagkakataon sa ginawang pagliibing kay Marcos.
Sinabi ni Dela Rosa, hindi sa PNP ang libingan, at seguridad lang ang kanilang ipinagkaloob sa nasabing okasyon.
Sikreto man aniya o hindi sikreto ang paglilibing sa dating pangulo, wala na silang pakialam dun dahil walang halong pulitika ang kanilang naging aksyon, bagkus ay serbisyo publiko lamang.