Pinagbigyan ng Sandiganbayan 1st division ang urgent motion na inihain ng kampo ni dating Senador Bong Revilla Jr., na makapanatili muna sa St. Luke’s Medical Center hanggang siya ay ma-discharge.
Si Revilla ay isinugod sa ospital noong Sabado matapos makaranas ng matinding pananakit ng ulo, pagsusuka at high-blood pressure.
Humanitarian consideration ang sinabing dahilan ng anti-graft court sa pagpayag nitong makapanatili muna sa ospital si Revilla.
Samantala, mariing itinanggi ng abugado ni Revilla na si Atty. Rean Balisi ang balitang kumalat sa social media na namayapa na ang senador.
Ayon kay Balisi, maayos ang lagay ni Revilla ngunit kailangan pang sumailalim sa ilang laboratory tests.
Sa pinakahuling medical bulletin na ipinalabas ng St. Luke’s Medical Center, na-diagnose umano si Revilla na mayroong acute migraine headache, tenosynovitis of the right arm, reactive hypertension, at esophagitis at non-erosive gastritis.
Maaari na rin umanong ma-discharge ang dating senador ngayong araw o ‘di kaya ay bukas, depende kung wala na itong mararamdaman na mangangailangan ng agarang aksyong medikal.
Si Revilla ay nahaharap sa kasong plunder matapos masangkot sa pork barrel scam.