Duterte, inaming hindi pa handa ang gobyerno sa pagtapos sa kontraktwalisasyon

Inamin ni Pangulong Rodrigo Duterte na hindi pa handa ang national government sa pagtapos sa kontraktuwalisasyon kahit na kanilang ipinanawagan sa private sector na gawing regular employee na ang kanilang mga emplyado.

Ayon kay Duterte, walang sapat na pondo ang gobyerno para siguruhing ang mga nagtatrabaho ay magiging ligtas sa kontraktwalisasyon, hindi tulad ng mga pribadong kompanya na ang mga regular ay aabot na sa libu-libong mga empleyado.

Mula sa datos ng Department of Labor and Employment (DOLE), nasa 16,000 na contractual workers ang naging regular na sa kanilang mga trabaho simula ng pumasok ang Duterte administration.

Kaugnay nito, sa kasalukuyan sinabi ni Duterte na hindi pa kakayanin ng gobyerno ang pagsalo sa responsibilidad ng pag-upgrade sa regular status ng mga manggagawa.

Binigyang diin pa ng pangulo na ang gross domestic product ng gobyerno ay wala pa sa magandang estado pero hindi niya inaalis ang posibilidad na lahat ng government workers ay magiging regular.