Committee report sa drug trade sa Bilibid inaprubahan na
Pinagtibay na ng House Committee on Justice ang committee report sa isinagawang imbestigasyon sa kalakalan ng droga sa New Bilibid Prisons o NBP.
Ang labing pitong pahinang committee report ay nabuo matapos ang apatnapu’t pitong oras ng imbestigasyon at dalawang executive sessions kung saan humarap ang dalawampu’t dalawang saksi.
Kinontra naman ng minority bloc ang laman ng committee report dahil wala unano rito ang rekomendasyon para sa pagpapanagot sa mga responsable sa paglipana ng drug trade sa NBP.
Tumanggi muna si Umali na isapubliko ang detalye ng report dahil bawal umano ito sa rules hangga’t hindi pa naire-refer sa plenaryo ang committee report.
Gayunman, sinabi ni Umali na mayroon silang findings ukol sa kumpirmasyon ng kalakalan ng droga sa Bilibid at pagkakasangkot dito ng mga opisyal na may superbisyon at kontrol sa pambansang piitan.
Naglatag din umano sila ng legislative measures para solusyunan ito.
Kaugnay nito, inaprubahan ng komite ang mosyon na magkaroon ng moto propio investigation ang sub-committee on correctional reforms laban kay Ronnie Dayan, sa nangyaring riot sa NBP, sa mga rebelasyon ni Gen. Benjamin Magalong kaugnay ng Oplan Cronus at pagtanggap ni dating BuCor Director Rafael Ragos ng P800,000 mula sa caterer ng Bilibid.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.