Ipinatawag ni Pangulong Rodrigo Duterte ang mga miyembro ng kanyang gabinete kaninang hapon para pulungin.
Kabilang sa mga pag-uusapan ay ang highlights ng kanyang biyahe sa Vietnam noong nakaraang linggo.
Ayon kay Presidential Communications Office (PCO) Sec. Martin Andanar, kasama rin sa agenda ng ika-pitong cabinet meeting ng pangulo ang crop farming system para sa mga lokal na pamahalaan.
Pag-uusapan din ang framework ng Philippine Development Plan 2017 to 2022 at ang magiging national security policy ng administrasyon.
Samantala, sa Oktubre 7 ng tanghali papatak ang unang isang daang araw ng Duterte administration.
Ayon kay PCO Asec. Ramon Cualoping, may dalawang oras na presentatation ang ipapalabas ng RTVM at mapapanood sa PTV 4 simula alas tres y media ng hapon na susundan ng ulat sa bayan ni Pangulong Duterte.
Pero ayon sa ilang opisyal ng PCO, isinasapinal pa nila ang mga aktibidad para sa ika-isang daang araw ng Duterte administration.