Batang hamog, patay matapos masagasaan ng truck sa Makati

Patay ang isang batang hamog matapos na masagasaan ng isang truck sa northbound lane ng Osmeña Highway, Magallanes, Makati City.

Ayon sa mga rumespondeng pulis, maaring nabundol muna ang biktima habang tumatawid bago naipit sa likurang gulong ng truck at nakaladkad ng aabot sa 500 metro.

Kita kasi ang bakas ng pagkakakaladkad sa hindi pa nakilalang biktima mula sa Magallanes bus stop.

Pilipit ang braso at halos nahubaran ang biktima bunsod ng insidente.

Hindi naman huminto ang truck na nakasagasa sa biktima.

Titignan ng mga otoridad ang CCTV footage sa lugar para matukoy ang nakasagasang truck.