Isinumite na ng Malacañang sa pamamagitan ng Department of Budget and Management ang P3.002 trillion proposed 2016 National Budget sa Kongreso.
Nagtungo sa kamara si Budget Secretary Butch Abad upang isumite ang kopya ng pambansang pondo sa liderato sa pangunguna ni House Speaker Feliciano Belmonte Jr., House majority leader Neptali Gonzales II at Appropriations chairman Isidro Ungab.
Para sa 2016, nanguna pa rin sa pinaglaanan ng pinakamalaking pondo ang Department of Education na may P435.9 bilyon, sinundan ng Department of Public Works and Highways na may P394.5 bilyon alokasyon.
Pumangatlo naman ang Department of National Defense na may P172.7 bilyon.
Pang-apat naman ang Department of Interior and Local Givernment na may P154.5 bilyon alokasyon, pang-lima ang Department of Health na may P128.4 bilyon, pang anim ang Department of Social Welfare and Development na may P104.2 bilyon, pang pito ang Department of Agriculture na may P93.4 bilyon alokasyon.
Sumunod naman ang Department of Finance na may P55.3 bilyon alokasyon, sinundan ng DOTC na may P49.3 bilyon, nasa P25.8 bilyon naman ang inilaan sa Department of Environment and Natural Resources habang P18.6 bilyon naman sa Department of Science and Technology.
Sa gitna ng mga batikos sa pangit na serbisyo ng train system sa bansa, nakaltasan ng 17% ang pondo ng Department of Transportation and Communications sa 2016, kumpara sa P59.4 billion alokasyon para sa taong kasalukuyan.
Bumaba rin ng 3.8% ang pondo ng DSWD sa 2016 kumpara sa P108.3 bilyon ngayong 2015. Pero sa kabuuan, mas mataas ang panukalang pondo sa 2016 ng 15.2% sa 2015 budget./ Isa Avendaño-Umali
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.