Sa kabila ng mga nauna niyang mga pahayag, nilinaw ni Pangulong Rodrigo Duterte na wala itong balak na putulin ang ugnayan sa mga bansang kaalyado nito sa kaslaukuyan.
Ayon kay Duterte,hindi niya ititigil ang pakikipagtulungan sa mga bansa na mayroon itong military alliance, ngunit sa halip, kanyang isusulong lamang ang nauna na nitong inihayag na independent foreign policy.
Giit ng pangulo, hindi rin siya anti-American at hindi rin ihihinto ang ugnayan sa Amerika.
Matatandaang nito lamang nakaraang araw, sinabi ng pangulo sa isang talumpati na nais na niyang paalisin sa Mindanao ang mga tropa ng Amerika.
Sa kabila ng pahayag na ito, sinabi ng US Department of State na nananatiling ‘committed’ ang kanilang bansa sa matagal nang alyansa nito sa Pilipinas at sa nagpapatuloy na kampanya kontra terorismo.
Sa kasalukuyan, nasa mahigit isandaang sundalong Amerikano ang namamalagi sa Western Mindanao Command sa Zamboanga City na nagbibigay ng ‘technical assistance’ sa kanilang local counterparts sa isyu ng counterterrorism at intelligence gathering.