Yellow rainfall warning, itinaas sa Metro Manila at mga kalapit lalawigan

Itinaas ng Philippine Atmospheric Geophysical and Astronomical Services Administration (PAGASA) ang yellow rainfall warning sa Metro Manila, Zambales, Cavite at Bataan kaninang alas-4:00 ng madaling araw.

Dahil dito, nagpaalala ang PAGASA ng posibleng pagbaha lalo na sa mabababang lugar.

Samantala, mararanasan naman ang mahina hanggang katamtamang pag-ulan sa Pampanga, Bulacan, Batangas at Rizal sa susunod na dalawa hanggang tatlong oras.

Ang mga pag-ulan na nararanasan sa mga nabanggit na lugar ay dahil sa umiiral na habagat.