Maraming lansangan sa Cordillera Administrative Region (CAR) ang hindi na madaanan ng mga motorist dahil sa naganap na mga rockslides at landslides.
Sa mga lansangan na patungo sa Baguio City, sarado ang Kennon Road dahil sa nagbaksakang bato sa kalsada; gayundin ang bahagi ng Benguet – Nueva Vizcaya Road partikular ang Ambuklao – Bokod Section at ang Pakak, Pito, Bokod Section dahil sa rock at landslides.
Sarado din ang Alab – Balili Section at ang Amcao Section ng Baguio Bontoc Road dahil sa mga nakahambalang na debris sa kalsada.
Sa Abra, sarado ang Nalbuan, Licuan Baay Kalinga Road; ang bahagi ng Gurel – Bokod – Kabayan – Buguias – Abatan road; bahagi ng Acop – Kapangan – Kibungan road; habang nagpapatupad ng open at close situation sa Sinipsip – Ampusongan road.
Sa Kalinga naman, sarado ang Pantikian section ng Kalinga – Abra road dahil sa gumuhong lupa.
Sa Ifugao, sarado din ang Kiangan – Tinoc Buguias boundary road.
Sa Mt. Province, sarado din dahil sa landslide ang Aluling section ng Mt Province to Ilocos Sur road; gayundin ang Junction – Talubin – Barlig – Natonin – Paracelis – Calaccad road; ang bahagi ng Sagada – Besao provincial road; at ang bahagi ng Mt. Province – Cagayan via Tabuk-Enrile road.
Ginagawa na ng Department of Public Works and Highways ang lahat upang malinis sa lalong madaling panahon ang mga nakabarang lupa at bato sa mga apektadong kalsada.