Apat na hinihinalang biktima ng summary execution ang itinapon sa magkahiwalay na lugar sa Pasay City simula alas 12:00 ng hatinggabi hanggang bago mag alas 5:00 ng umaga.
Una ng natagpuan ang bangkay ng isang lalaki sa may madilim na bahagi ng Diokno Avenue tapat ng gusali ng GSIS sa Pasay City.
Balot ng packaging tape ang mukha at ang dalawang kamay ng lalaki habang nasa kanyang ulo ang mensahe na “Huwag kaming tularan, carnapper / adik kami marami ng tao niloko namin”.
Ilang oras lamang ang nakalipas, natagpuan naman ang isa pang bangkay ng lalaki na may balot din ng packaging tape ang mukha at maging ang kamay sa bahagi ng southbound service road lane sa Pasay City sa gilid ng DTI compound.
Iniwanan din ng karatula ang biktima na may nakasulat na “Carnapper kami huwag tularan marami na kaming nabiktima”.
Wala pang isang oras, natagpuan namang patay ang isa pang lalaki sa Interior 1760 Taft Ave. Brgy. 41, Pasay City.
May balot din ng packaging tape ang bibig, kamay at paa at brief lang ang tanging suot ng lalaki.
Iniwanan din ng karatula ang biktima na nay nakasulat na “Akyat bahay ako ‘wag tuluran, ako si alyas kuntil”.
Ilang kalye lamang ang layo sa Brgy. 41 natagpuan naman ang isa pang bangkay ng lalaki na may packaging tape ang mukha, kamay at paa.
Hinihinalang mismong sa Donada St. sa Brgy. 33, Pasay City sa gilid lamag ng Arellano University pinatay ang biktima.
Iniwanan ng karatula ang biktima na may nakasulat na “Huwag tularan akyat bahay ako, ako po si Patrick”.