Nailipad na sa Maguindanao ang labi ni dating Maguindanao Governor Andal Ampatuan Sr.
Pasado alas nuwebe ng umaga kanina nang ang bangkay ay inilipat sa Maguindanao kulang sa isang Philippines Airlines flight ayon kay Atty. Salvador Panelo na nakapanayam ng Radyo Inquirer.
Nakiusap ang pamilya Ampatuan sa lahat na igalang ang kanilang pagdadalamhati.
Ito ay reaksiyon sa mga pahayag ng ilan na hindi ang totoong Andal ang namatay.
Ang labi ng matandang Andal ay naidaan pa sa Bicutan kung saan nakakulong ang kanyang mga anak na sina Zaldy, Andal Jr. at Anwar.
Noong nakaraang Sabado huling nakausap ni Panelo si Andal Sr. at sinabi ni Panelo na hanggang sa huli ay pinaninindigan ng dating gobernador na wala siyang kinalaman sa pagkamatay ng 58 katao na karamihan ay mga mamamahayag noong Nobyembre ng 2009.
“Sabi niya sa akin na gusto niyang gumaling para maupo sa witness stand. Sinasabi niya na frame-up ang nangyari”, ani Panelo.
Si Andal Sr. ay inilibing ayon sa kaugalian at paniniwala ng mga Muslim. / Gina Salcedo