Commonwealth Ave., hindi isinara; mga raliyista first time nakapasok sa IBP road
Kakaiba ang mga naging kaganapan ilang oras bago ang State of the Nation Address (SONA) ni Pangulong Rodrigo Duterte.
Dati tuwing SONA ng pangulo ng bansa, madaling araw pa lang, may isinasara nang bahagi sa magkabilang panig ng Commonwealth Avenue sa Quezon City.
Ito ay para bigyang-daan ang paglalatag ng seguridad sa nasabing kalsada, gaya ng paghaharang ng mga container vans na pangontra sa mga raliyista.
Kapag nagsimula nang lumiwanag, isasara na ang buong eastbound lang Commonwealth Avenue mula sa bahagi ng Ever Gotesco Mall sa Quezon City hanggang sa Commission on Audit (COA).
Sa mga nagdaang SONA kasi, ang mga grupong magpoprotesta kontra SONA ay pinapayagan lang hanggang sa bahagi ng Ever, at hindi hinahayaan na makalagpas sa St. Peter’s Church.
Habang ang mga grupo namang pro-administration ay pinapayagang magtipun-tipon sa harapan ng COA.
Ngayong unang SONA ni Duterte, kakaibang eksena ang makikita sa Commonwealth. Bukas at malayang nadadaanan ng mga motorista ang eastbound at westbound lane.
Wala kasing nakaharang na mga raliyista dahil sa unang pagkakataon, pinayagan silang makapanatili sa IBP Road, malapit sa Batasan complex.
Ayon kay Quezon City Police District (QCPD) Director Sr. Supt. Guillermo Eleazar, kagabi nila napagpasyahan na payagan sa IBP road ang mga raliyista para hindi na rin sila humarang sa mga motorista sa Commonwealth.
Ani Eleazar, tanging ang bahagi ng IBP road partikular ang mula sa Commonwealth Ave., hanggang sa IBP road ang sarado.
Ito ay para magamit ng mga raliyista gayundin para madaanan ng mga magtutungo at dadalo sa SONA.
Bukas naman ang bahagi ng IBP Road mula sa Litex Road hanggang sa Commonwealth Avenue.
Ayon naman kay Renato Reyes, secretary general ng grupong BAYAN o Bagong Alyansang Makabayan, maging ang mga miyembro nilang galing sa mga lalawigan ay hindi nakaranas ng panghaharang mula noong Sabado.
Aniya, malaya silang nakarating sa Metro Manila at nakalahok sa pagkilos.
Ayon kay Reyes, nakatutuwa na bukas si Pangulong Duterte sa malayang pamamahayag.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.