Pinagplanuhan umano ng mahabang panahon ang naganap na pag-atake kamakailan sa Nice, France na nagresulta sa pagkasawi ng 84 na katao na pawang dumadalo sa selebrasyon ng Bastille day.
Ayon kay prosecutor Francois Molins, posibleng taong 2015 pa nagsimulang magplano si Mohamed Lahouaiej Bouhlel, ang driver ng truck na sumagasa sa mga taong nanonood ng fireworks display.
Kasabwat umano sa pagpaplano ni Bouhlel ang lima pang suspek na inaresto kanina mga otoridad sa France na kinabibilangan ng isang French-Tunisian, dalawang Tunisian, mag-asawang French-Albanian at isang Albanian.
Ang limang suspeks na nakilalang sina Ramzi A., 22 anyos; Chokri C., 37 anyos; Mohamed Oualid G., 40 anyos; Artan H., 38 anyos at asawa niyang si Enkeledja Z. ay sinampahan na ng kaso.
Ayon kay Molins may nakita silang mga larawan sa cellphone ni Bouhlel noong 2015 Bastille day celebration kung saan mistulang nagmamanman siya sa pagdiriwang.
Noong April 14, 2016 nagpadala pa ng Facebook message ang isa sa naarestong si Chokri kay Bouhlel kung saan tila binigyang instruction ang driver ng trak sa kung ano ang gagawin.
“Load the truck with 2,000 tonnes of iron… release the brakes my friend and I will watch”, ang mensahe ni Chokri kay Bouhlel.
Mula July 2015 naman hanggang July 2016, natuklasang 1,280 na beses na nagtawagan sa isa’t isa sina Bouhlel at isa pang suspek na si Oualid.