Pananambang sa pulis sa Batangas, posibleng dahil sa droga

Hinihinalang may kinalaman sa iligal na droga ang pananambang sa isang pulis sa Batangas City.

Ayon kay Batangas City deputy police chief Chief Insp. Jose Naparato, minamaneho ni SPO3 Limuel Panaligan ang kaniyang sasakyan sa may Barangay Kumintang Ibaba nang bigla siyang barilin ng isang lalaking sakay ng motorsiklo dakong tanghali ng Linggo.

Nasawi si Panaligan habang dinadala sa Batangas Medical Center.

Ani Naparato, sumailalim si Panaligan sa isang recovery program na para sa mga pulis na nasangkot sa paggamit at pagbebenta ng iligal na droga.

Ngunit aniya, sa kabila nito ay hindi pa rin tumigil si Panaligan sa kaniyang iligal na gawain.