Sen. JV Ejercito dumipensa sa kinakaharap na ethics complaint

MANILA, Philippines — Nagpaliwanag si Senate Deputy Majority Leader JV Ejercito ukol sa ethics complaint na isinampa laban sa kanya kaugnay sa reklamo laban kay Sen. Francis “Chiz” Escudero.

Ayon kay Ejercito, ang namumuno sa Senate ethics and privileges committee, walang pang miyembro ang komite kayat hindi matalakay ang ethics complaint laban kay Escudero.

Magugunita na sinampahan ng ethics complaint si Ejercito ni Atty. Marvin Aceron  dahil sa “gross neglect of duty.”

BASAHIN: Escudero handang ipaliwanag P30-M donasyon ng Bicol contractor

Ikinatuwiran ni Aceron noon pang nakaraang Oktubre nang ireklamo si Escudero sa cthics committee dahil sa pagtanggap ng campaign contribution mula sa isang contractor noong 2022.

Sinabi naman ng Commission on Elections (Comelec) na walang nilabag si Escudero dahil sa idineklara niya sa kanyang isinumiteng Statement of Contributions and Expenditures (SOCE) ang personal na donasyon ng kontratista.

Dagdag paliwanag ni Ejercito naging abala din ang mga senador sa pagtalakay sa 2026 national budget noong huling bahagi ng nakaraang taon bukod sa dalawang beses siyang na-ospital.

Tiniyak ng senador na haharapin niya ang lahat ng ethics complaint laban sa ilang senador sa pagbabalik ng sesyon sa susunod na linggo at aniya unang tatalakayin ang mga unang isinampang reklamo.

Nais ni Aceron na unang talakayin ang reklamo laban kay Escudero.

TAGS: